इमानदार हुनुहोस्

मत्ती ५ः२८ मा, येशूले भन्नुहुन्छ, "जसले कुनै स्त्रीलाई कामवासनाले हेर्छ, उसले पहिले नै आफ्नो हृदयमा त्यससँग व्यभिचार गरिसकेको हुन्छ ।" यसबाट छुटकारा पाउनको लागि हामी परमेश्वरकहाँ जानुपर्छ, र पहिलो कदम इमानदार हुनु हो । यदि तपाईंलाई रिस उठेको छ भने इमानदार हुनुहोस् । तपाईंले गलत गर्नुभएको व्यक्ति कहाँ जानुहोस् र भन्नुहोस्, "भाइ, मलाई माफ गर्नुहोस् । मैले तपाईंसँग गलत तवरले बोलेकोमा मलाई माफ गर्नुहोस्," र यदि तपाईंले रिसाएर दिनमा दश पटक पाप गर्नुभयो भने, त्यो व्यक्तिकहाँ दश पटक नै जानुहोस् र भन्नुहोस् म क्षमा चाहन्छु । यदि परमेश्वरले तपाईंलाई इमानदार र नम्र देख्नुभयो भने, उहाँले तपाईंलाई यसबाट मुक्त हुने शक्ति दिनुहुनेछ ।

तर यदि तपाईंले ढाकछोप गर्नुभयो, बहाना बनाउनुभयो, र आफ्नो रिसलाई जायज ठहराउने प्रयास गर्नुभयो भने, तपाईं कहिल्यै स्वतन्त्र हुनुहुने छैन । रिस उठ्दा जायज ठहराउने समय मात्र परमेश्वरको महिमा हुने सवालमा हुन्छ, आफ्नो सवालमा होइन ।

जब स्त्रीप्रतिको कामवासनाको कुरा आउँछ, तपाईं कहिल्यै पनि जायज हुनुहुन्न । तपाईं आफ्नी श्रीमतीलाई हेरेर उसको प्रशंसा गर्न सक्नुहुन्छ, तर अरु कुनै स्त्रीलाई होइन । त्यो परमेश्वरको इच्छा होइन । परमेश्वर भन्नुहुन्छ कि तपाईं यहाँ गम्भीर हुनुपर्छ । सबैभन्दा पहिले, तपाईंले इमानदार भएर भन्नुपर्छ, "प्रभु, मैले व्यभिचार गरें ।" कहिल्यै नभन्नुहोस्, "मैले सुन्दर अनुहारको प्रशंसा गरें ।" बरु, "मैले व्यभिचार गरें" भन्नुहोस् ।

यदि तपाईं इमानदार रहनुहुन्छ भने, परमेश्वरले तपाईंलाई छुटकारा दिनुहुनेछ ।

गम्भीर हुनुहोस्

अर्को कुरा तपाईंले गर्नुपर्ने भनेको गम्भीर हुनु हो । बाइबलले भन्छ, "अनैतिकतादेखि भाग" (१ कोरिन्थी ६ः१८) । यदि तपाईं कम्प्युटरमा हुनुहुन्छ र तपाईं प्रलोभनमा पर्नुभयो भने, या त त्यसबाट पर भाग्नुहोस् वा यसलाई बन्द गर्नुहोस् र भन्नुहोस्, "प्रभु, के छुट्ला भन्नेमा मलाई वास्ता छैन, तर म यहाँ लड्न चाहन्न" । जब येशूले भन्नुहुन्छ, "यदि तपाईंको दाहिने आँखाले तपाईंलाई ठेस पुर्याउँछ भने त्यसलाई निकालिदिनुहोस्," उहाँले हामीलाई शारीरिक रुपमा नै हाम्रो दाहिने आँखा निकाल्नको लागि भनिरहनु भएको होइन । त्यो स्पष्ट छ किनकि तपाईं देब्रे आँखाले अझै पनि कामवासना गर्नसक्नुहुन्छ । यसको अर्थ यो हो कि तपाईंले पाप प्रति गम्भीर दृष्टिकोण राख्नुपर्छ, आफ्नो जिब्रो र आँखाहरु प्रति गम्भीर दृष्टिकोण राख्नुपर्ने हुन्छ ।

जब तपाईं प्रलोभनमा पर्नुहुन्छ, त्यसबेला अन्धो र लाटो मानिस जस्तै बन्नुहोस् । के लाटो मानिसले आफ्नो आवाज चर्को गरेर कसैलाई कराउन सक्छ ? के अन्धो मानिसले कामवासना गर्नसक्छ ? सक्दैन । अन्धो मानिस जस्तै बन्नुहोस् र भन्नुहोस्, "प्रभु, तपाईंले मलाई स्त्रीहरु प्रति कामवासना गर्नको लागि आँखा दिनुभएन । तपाईंले मलाई तपाईंको महिमा देख्नको लागि आँखा दिनुभयो ।" येशू भन्नुहुन्छ कि यदि तिमीले त्यसो गरेनौ भने, तिमीले आफ्नो शरीरको भौतिक अंगहरु सुरक्षित राख्न सक्छौहोला, तर तिमी अझै पनि नरकमा फालिनेछौ । तपाईंको शरीरको एउटा अंग गुमाउनु (त्यो भनेको, तपाईं भौतिक शरीरले चाहेको पापपूर्ण आनन्दलाई स्वेच्छाले अस्वीकार गर्नु) र परमेश्वरको राज्यमा जानु तपाईंको लागि असल हो ।

त्यसैगरी, येशू भन्नुहुन्छ, "यदि तिमीले आफ्नो दाहिने हातले यौन पाप गर्यौ र त्यसले तिमीलाई ठेस पुर्याउँछ भने, त्यसलाई काटिदेऊ" (मत्ती ५ः३०) । कल्पना गर्नुहोस् कि तपाईंको हात काटिएको छ र तपाईंले आफ्नो दाहिने वा देब्रे हातले पाप गर्न सक्नुहुन्न । येशू धेरै सरल र व्यवहारिक हुनुहुन्थ्यो । येशूले तपाईंलाई अन्धा जस्तो व्यवहार गर्न भन्नुहुन्छ, मानौं तपाईंको अंग काटिएको छ, किनकि पाप धेरै गम्भीर छ । यदि हामीले यस्तो गम्भीर मनोवृत्ति राख्यौं भने, मलाई विश्वास छ कि परमेश्वरले हामीलाई पूर्णरुपमा स्वतन्त्र हुन मद्दत गर्नुहुनेछ, र हाम्रो विवाह पनि असल हुनेछ । विवाहले स्त्रीप्रतिको कामवासनाको समस्या समाधान गर्छ भनी नसोच्नुहोस् । धेरै विवाहित व्यक्तिहरु छन् जो सधैं आफ्नो विचारमा व्यभिचारमा फस्छन् । हरेक दिन धेरै विवाहित व्यक्तिहरु इन्टरनेटमा अस्लील कुराहरु हेर्ने गर्छन् । विवाहले त्यो समस्या समाधान गर्दैन किनकि यो एउटा भित्री इच्छा हो । यदि तपाईंले पवित्र आत्माको शक्तिमा यसको सामना गर्नुभएन भने, तपाईं पराजित हुनुहुनेछ, तपाईंले जीवनभर आफूलाई आत्मिक ख्रीष्टियान भएको भ्रममा पर्नुहुनेछ जबकि तपाईं हुनुहुन्न ।

के यो येशूले गरिरहनुभएको कुरा कुनै स्नातकोत्तर तहको ख्रीष्टियान चरित्र हो ? होइन, उहाँ केवल नरकबाट कसरी उम्कने भन्ने बारेमा कुरा गर्दै हुनुहुन्छ । नरकबाट बच्नु भनेको स्नातकोत्तर ख्रीष्टियान विषयवस्तु होइन । यो प्राथमिक कुरा हो । येशूले भन्नुहुन्छ कि तपाईंको सम्पूर्ण शरीर नरकमा फ्याँकिनु भन्दा तपाईंको शरीरको अंग नष्ट हुनु असल हो । नरकबाट मुक्ति पाउनु नै न्युनतम कुरा हो, र येशूले हामीलाई हरेक राष्ट्रका प्रत्येक चेलालाई यही सिकाउन चाहनुहुन्छ । यो कति सिकाइँदैछ ? सायदै, र त्यसैले मलाई प्रभुले व्यक्तिगत रुपमा मेरो आफ्नै सेवकाईमा यसलाई जोड दिइरहन आदेश दिनुभएको छ ।