मत्ती ५ः३ मा येशू भन्नुहुन्छ, "धन्य आत्मामा दीनहुनेहरु ।" यो "धन्य" शब्दको अर्थ "खुशी" हुनसक्छ वा एम्प्लीफाइड बाइबलले भने जस्तै, "डाहा गरिनुपर्ने कोही ।" यदि तपाईं पृथ्वीमा कसैलाई डाहा गर्न चाहनुहुन्छ भने, धनी व्यक्तिको डाहा नगर्नुहोस्, प्रसिद्ध व्यक्तिको डाहा नगर्नुहोस्, र सुन्दर देखिने व्यक्तिको डाहा नगर्नुहोस् । आत्मामा दीन हुने व्यक्तिको डाहा गर्नुहोस्, किनकि स्वर्गको राज्य उसैको हो । आकर्षित गर्नसक्ने र धन जस्ता धेरै अन्य गुणहरु भएका मानिसहरुले यस पृथ्वीका चीजहरु पाउन सक्छन् र पृथ्वीमा राज्य प्राप्त गर्नसक्छन्, तर स्वर्गको राज्य आत्मामा दीन हुनेहरुको हो । अन्ततः, यो त्यही व्यक्तिको हो जसलाई साँच्चै डाहा गर्न सकिन्छ, किनकि उसको सम्पत्ति अनन्तकालसम्म रहनेछ । जब हामी पृथ्वीमा हाम्रो जीवनकालको बारेमा सोच्दछौं, चाहे त्यो ७० वा ८० वर्षको नै किन नहोस्, यदि तपाईं साँच्चै विश्वास गर्नुहुन्छ कि मानिस एक अनन्त प्राणी हो (अनन्ततामा कहिल्यै अन्त्य हुँदैन, लाखौं वर्ष अनन्ततामा एक सेकेन्ड जस्तै हो), ७० वर्ष कति हुन्छ ? केही हुँदैन । २ पत्रुसमा, हजार वर्ष प्रभुको सामु एक दिन जस्तै हो र एक दिन हजार वर्ष जस्तै हो भनिएको छ । अनन्तताको प्रकाशमा, पृथ्वीमा हाम्रो सम्पूर्ण जीवन धेरै छोटो छ ।

बुद्धिमान व्यक्ति त्यो हो जसले साँच्चै परमेश्वरको राज्यमा भविष्य खोज्छ, र यहाँ हामीलाई भनिएको छ कि परमेश्वरको राज्यमा सबैभन्दा धेरै सम्पत्ति पाउने व्यक्ति त्यो हो जो आत्मामा दीन छ । यो एउटा वाक्यांश हो जुन धेरै ख्रीष्टियानहरुले बुझेका छैनन् किनभने तिनीहरु धर्मशास्त्रका यी भ्रामक देखिने कथनहरु बुझ्न खोज्दैनन् । तिनीहरु केवल पढ्छन् र अगाडि बढ्छन् । मलाई मद्दत गर्ने एउटा कुरा भनेको दृष्टान्तको हिसाबले सोच्नु हो । जब म चित्रहरुको सन्दर्भमा सोच्दछु म त्यो पाउँदछु, मैले धर्मशास्त्रको स्पष्ट समझ प्राप्त गर्छु । वास्तवमा, येशू आफैंले धेरै सिद्धान्तहरुलाई चित्रहरुको रुपमा व्याख्या गर्नुभयो, जस्तै नुन र प्रकाश, धेरै दृष्टान्तहरु मार्फत ।

हामी "आत्मामा दीन" लाई "शरीरमा दीन" सँग तुलना गर्नसक्छौं, किनकि मानिस आत्मा र शरीर हो, र हामी बुझ्छौं कि शरीरमा दीन हुनु भनेको के हो । घर विहीन वा भिखारी शरीरले कमजोर हुन्छ, जसको अर्थ उसको शारीरिक आवश्यकताहरु पूरा गर्न आवश्यक पर्ने कुरा ऊसँग हुँदैन । सडकमा बस्ने साँच्चै एक गरिब भिखारीले आफ्नो आवश्यकता पूरा गर्न घरघर गएर भिख माग्न सक्छ, केवल दिनभरिको लागि पर्याप्त मात्रामा पाउनको लागि, र त्यसपछि उसले भोलिपल्टको लागि थप केही प्राप्त गर्न उही घरमा फर्कनु पर्नेछ । त्यसकारण त्यो चित्रलाई "आत्मामा दीन" भन्ने वाक्यांशमा लागू गर्दा हामी देख्छौं कि येशूले त्यो एक व्यक्ति भन्दै हुनुहुन्थ्यो जो हरेक दिन आफ्नो आत्मिक आवश्यकताको बारेमा सचेत हुन्छ । उहाँले त्यो भिखारी जस्तै व्यक्तिको वर्णन गर्दै हुनुहुन्छ, जो हरेक दिन आफ्नो शारीरिक आवश्यकताको बारेमा सचेत हुन्छ र मद्दतको लागि कुनै उदार मानिसको घरमा जान्छ । अनि यदि त्यो मान्छेले उसलाई सोध्यो भने, "मैले तिमीलाई हिजो दिएको कहाँ गयो त?" उसले भन्नेछ, "त्यो हिजो सकियो - तपाईंले मलाई हिजो दिनुभएको पैसा हिजोको आवश्यकताको लागि पर्याप्त थियो, र फेरि मलाई आवश्यकता छ । मसँग कत्ति पनि छैन, म खाँचोमा छु ।"

"आत्मामा दीन" व्यक्ति त्यो हो जो परमेश्वरकहाँ यसरी आउँछ र भन्छ, "प्रभु, म खाँचोमा परेको एक व्यक्ति हुँ ।" जसरी भिखारीले आफ्नो भौतिक आवश्यकताहरु पूरा गर्न मद्दत माग्छ, त्यसरी नै ऊ आफ्नो आत्मिक आवश्यकताको बारेमा सचेत हुँदै हरेक दिन परमेश्वरकहाँ आउँछ र आफ्नो आत्मिक आवश्यकता पूरा गर्न मद्दत माग्छ ।

हितोपदेशको पुस्तकमा, यस अवस्थाको बारेमा बोल्ने एउटा पद छ । हितोपदेश ८ बुद्धिको बारेमा एउटा अध्याय हो, र यहाँ ख्रीष्टलाई बुद्धिको रुपमा चित्रण गरिएको छ, उहाँले भन्नुभएको छ, "म, बुद्धि..." (पद १२ बाट सुरु गर्दै) । उनी अगाडि भन्छन् कि ज्ञानद्वारा नै संसारको सृष्टि भएको हो । अनि पद २४ मा भनिएको छ कि खेतहरु, पृथ्वी र अरु सबैथोक हुनुभन्दा पहिले उहाँ त्यहाँ हुनुहुन्थ्यो - जब उहाँले स्वर्ग स्थापना गर्नुभयो (पद २७) उहाँ त्यहाँ हुनुहुन्थ्यो । त्यसैले हामीलाई चाहिने कुरा बुद्धि हो, र यसले भन्छ, "धन्य हो त्यो मानिस जसले मेरो कुरा सुन्छ, जसले दिनहुँ मेरो ढोकामा हेरिबस्छ ।" परमेश्वरको ढोकाको चौकसमा पर्खिरहेको त्यो माग्नेलाई अब सम्झनुहोस् । जसरी एक भिखारी आफ्नो दैनिक पैसारुपी उपहारको लागि पर्खिरहेको हुन्छ, त्यसरी नै हामी पनि हरेक दिन आत्मिक रुपमा दीन भएर परमेश्वरको सामु आउनुपर्छ ।

हामी खाँचोमा नपरेसम्म त्यसरी आउने छैनौं । धनी मानिसहरु अरुको घरमा भिख माग्न जाँदैनन्; उनीहरुलाई त्यसो गर्न लाज लाग्नेछ । भिखारीलाई लाज लाग्दैन किनकि ऊ अभावमा छ । ऊसँग खाना वा दैनिक आवश्यकताका सामान किन्न पैसा छैन, र उसलाई यो कुरा थाहा छ । हरेक दिन आफ्नो आत्मिक आवश्यकताको बारेमा सचेत व्यक्ति मात्र परमेश्वरको सामु हरेक दिन आउँछ र भन्छ, "प्रभु, म खाँचोमा परेको एक व्यक्ति हुँ । आजको लागि मलाई बुद्धि दिनुहोस् ।" अनि हितोपदेश ८ः३५ मा भनिएको छ, "जसले मलाई भेट्टाउँछ, उसले जीवन पाउँछ ।"

आत्मामा दीन हुनुको अर्थ यही होः हाम्रो आत्मिक आवश्यकताको बारेमा निरन्तर सचेत रहनु । जो आफ्नो आत्मिक आवश्यकताको बारेमा निरन्तर सचेत रहन्छ र परमेश्वरबाट बुद्धि खोजिरहन्छ, उसले स्वर्गको सम्पूर्ण राज्य पाउनेछ । यदि तपाईंले स्वर्गको राज्यलाई परमेश्वरको राज्यको धनको रुपमा हेर्नुहुन्छ भने, बाइबलले एफिसी १ः३ मा भन्छ, परमेश्वरले हामीलाई ख्रीष्टमा स्वर्गीय स्थानहरुमा हरेक आत्मिक आशिषले आशिर्वाद दिनुभएको छ । पवित्र आत्माको हरेक आशिष स्वर्गीय स्थानहरुमा ख्रीष्टमा हाम्रो हो । हामी स्वर्गको राज्यमा पाइने सबै आत्मिक आशिषहरुलाई हजारौं कोठा भएको भव्य महलको रुपमा सोच्न सक्छौं, र त्यो महलको हरेक ढोका खोल्ने मास्टर चाबी आत्माको दीनता हो । धन्य त्यो हो जो आत्मामा दीन छ, किनकि उसले स्वर्गको सम्पूर्ण राज्य - अर्थात् महलको प्रत्येक कोठा प्राप्त गर्न सक्छ । यदि उसले मास्टर चाबीलाई बलियोसँग पक्रिराख्यो भने, हरेक कोठामा भएका खजानाहरु उसको हुनेछन् ।