जब कुनै विश्वासी नयाँ सत्यलाई पक्रन्छ, ऊ सजिलैसँग यति धेरै हदसम्म जानसक्छ कि पहिलो सत्यलाई सन्तुलनमा राख्ने अन्य सत्यहरुको बेवास्ता हुन्छ । यो सत्य हो विशेषगरी साँचो ख्रीष्टियान विश्वासको सन्दर्भमा ।

पुरानो करार अन्तर्गत विश्वास महत्वपूर्ण थिएन । केवल कामहरु महत्वपूर्ण थिए । मोशाको व्यवस्थाले परमेश्वरमा विश्वास राख्ने बारेमा केही भनेन । तर यसले ६१३ आज्ञाहरु दियो - परमेश्वरलाई खुशी पार्न चाहने मानिसहरुले पालना गर्नुपर्ने कामहरुको लामो सूची ।

तर जसै हामी नयाँ करारमा आउँछौं, हामी पढ्छौं, "अनुग्रह मार्फत विश्वासद्वारा तिमीहरुले उद्धार पाएका छौ; र त्यो तिमीहरु आफैंबाट होइन, यो परमेश्वरको वरदान हो; कामहरुको परिणामस्वरुप होइन, ताकि कसैले घमण्ड नगरोस्" (एफिसी २ः८,९) । यो पद एक्लै पढ्दा, धेरै विश्वासीहरु अतिवादमा फस्छन् र भन्छन् कि कामहरु त्यसकारण महत्वपूर्ण छैनन् - किनकि (यस पदले भनेझैं), कामहरुले व्यक्तिलाई आफूले गर्न सक्ने कुरामा घमण्ड गर्न लगाउँछन् ।

तर नयाँ करारले वास्तवमा के सिकाउँछ ? धर्मशास्त्रको एउटा पदमा मात्र तपाईंले सम्पूर्ण सत्य पाउन सक्नुहुन्न । जब शैतानले उजाडस्थानमा येशूलाई एउटा पद उद्धृत गर्दै भन्यो, "यो लेखिएको छ....(मत्ती ४ः६)", येशूले भन्नुभयो, "अर्कोतर्फ यो पनि लेखिएको छ..." । त्यसैले हामी देख्छौं कि यदि हामीले पूर्ण सत्यलाई सही रुपमा बुझ्न चाहन्छौं भने, धर्मशास्त्रको एउटा पद प्रायः धर्मशास्त्रको अर्को पद (वा पदहरु) द्वारा सन्तुलित हुनैपर्छ । यदि शैतानले प्रभु येशूलाई पनि धर्मशास्त्रको एउटा पदले धोका दिने प्रयास गर्‍यो भने, आज उसले धर्मशास्त्रको केही एक्लो पद लिएर झन् कति धेरै प्रयास गर्नेछ र विश्वासीहरुलाई धोका दिनेछ । त्यसैले हामी धोकामा नपर्नलाई धर्मशास्त्र अध्ययन गर्दा हामी अत्यन्तै होसियार हुनैपर्छ । चराहरु जस्तै, सत्यका पनि दुई पखेटा हुन्छन् - र यदि तपाईं सीधा उड्न चाहनुहुन्छ भने तपाईंले ती दुबै प्रयोग गर्नुपर्छ । एउटा पखेटाले मात्र तपाईं या त पूर्णरुपमा पथभ्रष्ट हुनुहुनेछ, या चक्रमा घुम्नुहुनेछ र कहिल्यै प्रगति गर्नुहुनेछैन !

हामीले एफिसी २ मा यो सन्तुलन देख्छौं, जहाँ एकातिर यसले भन्छः "अनुग्रह मार्फत विश्वासद्वारा तिमीहरुले उद्धार पाएका छौ; र त्यो तिमीहरु आफैंबाट होइन, यो परमेश्वरको वरदान हो; कामहरुको परिणाम होइन, ताकि कसैले घमण्ड नगरोस् ।"

तर कोही पनि भ्रममा नपरोस् भनेर (केवल त्यो "एउटै पखेटामा उड्दै"), यसले तुरुन्तै अर्को पदमा भन्छः "हामी उहाँका हातका सीप हौं, ख्रीष्ट येशूमा असल कामहरुका लागि सृष्टि गरिएका, जुन परमेश्वरले पहिले नै तयार पार्नुभएको थियो ताकि हामी तिनीहरुमा हिँडौं ।" (एफिसी २ः८-१०) । त्यसैलेः हामी बचाइएका छौं - असल कामहरुद्वारा होइन - तर असल कामहरुका निम्ति जुन परमेश्वरले पहिले नै तयार पार्नुभएको छ, हामीहरु हिंड्नको लागि ।

फिलिप्पी २ः१२, १३ मा पनि हामी यही सन्तुलन देख्छौं । त्यहाँ हामीलाई "भय र कम्पसहित आफ्नो मुक्तिको काम गर" भनेर आग्रह गरिएको छ । तर त्यसपछि यो भनिएको छ कि "परमेश्वर नै हुनुहुन्छ जसले उहाँको असल अभिप्रायको लागि इच्छा गर्ने र काम गर्ने दुबै तुल्याउनको लागि तिमीहरुमा काम गरिरहनुभएको छ ।" परमेश्वरले हामी भित्र जे काम गर्नुहुन्छ त्यही काम हामीले गर्नुपर्छ ।

याकूब २ः१७, १८ ले भन्छ, "यदि विश्वास काम रहित छ भने त्यो आफैंमा मरेतुल्य हुन्छ" । अनि त्यसपछि याकूब भन्छन् कि "कसैले भन्न सक्ला, 'तिमीसँग विश्वास छ र मसँग काम छ'" । तर याकूब (पवित्र आत्मामा अभिप्रेरित भएर) भन्छन्, "कामबिनाको तिम्रो विश्वास मलाई देखाऊ र म तिमीलाई मेरो कामद्वारा मेरो विश्वास देखाउनेछु ।" त्यसैले जुन विश्वासले "विश्वासका कामहरु" उत्पादन गर्दैन त्यो मृत विश्वास हो । त्यो नै मृत विश्वास र जीवित विश्वास बीचको भिन्नता हो ।

साँचो ख्रीष्टियान विश्वासले सधैं विश्वासका कामहरु सृजना गर्नेछ - अर्थात्, पवित्र आत्मामा निर्भर भएर उत्पादन गरिएका कामहरु । किनभने विश्वास वास्तवमा यही होः पवित्र आत्मामा निर्भरता, जसरी फल फलाउनको लागि हाँगा रुखमा निर्भर हुन्छ । त्यसैले, यदि हामीसँग नयाँ नियममा पाइने सत्यताको सन्तुलन साँच्चै छ भने, यो ख्रीष्टको समानता हाम्रो जीवनमा देखिनेछ - पवित्र आत्माको शक्तिद्वारा, विश्वासद्वारा (अर्थात्, उहाँमाथिको हाम्रो निर्भरताद्वारा) उत्पादित हाम्रा घरको सम्बन्धहरु र काम गर्ने थलोहरु दुबैमा ।

कामबिनाको विश्वास मृत बौद्धिक विश्वास हो - र यो व्यक्तिको हृदयमा पवित्र आत्माद्वारा उत्पादन गरिएको वास्तविक विश्वास होइन । वास्तविक ख्रीष्टियान विश्वास भनेको परमेश्वरमा पूर्ण निर्भरता हो, जसले सधैं व्यक्तिको जीवनमा बढ्दो ख्रीष्टको समानताको फल फलाउँछ । अर्कोतर्फ, विश्वासबिनाको काम भनेको आफ्नै मानवीय प्रयासद्वारा परमेश्वरलाई खुशी पार्ने प्रयास गर्नु हो - स्व-धार्मिकता ल्याउँदै, जसलाई धर्मशास्त्रले "फोहोर झुत्रा" भन्छ । (हाम्रा सबै धार्मिक कामहरु फोहोर लुगा जस्तै हुन् - यशैया ६४ः६) ।

यस लेखमा मैले साटेको कुरा एकदमै सत्य कुरा हो - किनकि हाम्रो अनन्तको गन्तव्य यसमै निर्भर छ - र त्यसैले हामी यस विषयमा गलत हुने कुराको मूल्य चुकाउन सक्दैनौं । त्यसैले शैतानलाई झुटो "विश्वास" द्वारा तपाईंलाई धोका दिन नदिनुहोस् जुन केवल एक बौद्धिक विश्वास हो जसले हामीमा ख्रीष्टको जीवन प्रकट गर्दैन ।

जसको सुन्ने कान छ, उसले सुनोस् । आमेन ।